Home గల్పిక రక్తచరిత్ర-3కి స్కెచ్‌ వేసిన సోమిరెడ్డి

రక్తచరిత్ర-3కి స్కెచ్‌ వేసిన సోమిరెడ్డి

అది ప్రపంచంలోని అన్ని దేశాల ప్రజలు కూడా ఈయన మా దేశ అధ్యక్షుడు అయితే మా బ్రతుకులు ఎంతో బాగుండు అని కోరుకునే హైటెక్‌రత్న, నవ్యాంధ్ర సీఎం చంద్రబాబునాయుడు వుంటున్న విజయవాడ నగరం. ఆ నగరంలో టీడీపీ రాష్ట్ర కార్యాలయం. విజయవాడ ఎంపి కేశినేని నాని, రాష్ట్ర సేద్యం శాఖ మంత్రి సోమిరెడ్డి చంద్రమోహన్‌ రెడ్డిలు ప్రెస్‌మీట్‌ పెట్టారు. కేశినేని మాట్లాడుతూ జగన్‌పై హత్యాయత్నం చేయించాల్సిన అవసరం మాకేముంది. మేము చేయించాలనుకుంటే ఎయిర్‌ పోర్టులో చేయిస్తామా… మా కార్యకర్తలు తలచు కుంటే రోడ్డుమీదే కైమా కొట్టుండేవాళ్ళు… అని అన్నాడు. వెంటనే ‘ఆత్మసాక్షి’ విలేకరి లేచి… ఇంతకు ముందు మీరేమన్నా మటన్‌కొట్లో పని చేశారా సార్‌ అని అడిగాడు. అందుకు నాని… ఇంచుమించు అలాగే అనుకో అని చెప్పాడు. తర్వాత సోమిరెడ్డి మాట్లాడుతూ జగన్‌ మీద మేం మర్డర్‌ప్లాన్‌ చేస్తే పిల్లోళ్ల చేతికి పిన్నీసులు, గుండుసూదులు ఇచ్చి పంపిస్తామా… మేం స్కెచ్‌ వేస్తే… రక్తచరిత్ర, రక్త సింధూరం, రక్తతిలకం, రక్తాభిషేకం, రక్తకన్నీరు, రక్తసిరా సినిమాలన్నింటిని కలిపి ఒకేసారి చూసి నట్లుగా వుంటుంది. మర్డర్‌లు చేయాలంటే స్కెచ్‌ కరెక్ట్‌గా వుండాలి అంటూ స్కెచ్‌పెన్‌ను చెవిలో తిప్పుకుంటూ… స్కెచ్‌లు వేయాలంటే ఒక దావూద్‌ ఇబ్రహీం, ఒక చోటా షకీల్‌, ఒక పరిటాల రవి, ఒక మద్దెలచెరువు సూరి… ఒక సోమిరెడ్డి చంద్రమోహన్‌రెడ్డి… అని చెప్పి ప్రెస్‌ మీట్‌ ముగించాడు.

————

అల్లీపురంలోని సోమిరెడ్డి చంద్రమోహన్‌రెడ్డి ఇల్లు. సోమిరెడ్డితో పాటు ఆయన కొడుకు రాజ గోపాల్‌రెడ్డి, ఎమ్మెల్సీ బీద రవిచంద్ర, మంత్రి నారా యణ, టి.అనూరాధ, కోటంరెడ్డి శ్రీనివాసులురెడ్డి, డాక్టర్‌ జడ్‌.శివప్రసాద్‌, ఈదూరు రామ్మోహన్‌రెడ్డి, మోపూరు శ్రీనివాసులురెడ్డి, కిలారి వెంకటస్వామి నాయుడు, కోడూరు కమలాకర్‌రెడ్డి, మేకల రామ్మూర్తి, దాసరి రాజేష్‌ వంటి నాయకులున్నారు. అందరూ డైనింగ్‌ హాల్‌లో డైనింగ్‌ టేబుల్‌ చుట్టూ కుర్చీలలో కూర్చున్నారు. డైనింగ్‌ టేబుల్‌ మీద వైట్‌ చార్ట్‌బోర్డు పరచివుంది. మంత్రి నారాయణ వుండి… ఇక స్కెచ్‌ మొదలుపెట్టండి అని సోమిరెడ్డిని అడిగాడు. స్కెచ్‌ వేయాలంటే ముందుగా స్కెచ్‌పెన్‌ కావాలని సోమిరెడ్డి అడిగాడు. వెంటనే సోమిరెడ్డి రాజ గోపాలరెడ్డి ఇంట్లోకి వెళ్లి స్కెచ్‌పెన్‌ల ప్యాకెట్‌ తెచ్చి తన తండ్రికిచ్చాడు. ఆయన ఆ ప్యాకెట్‌లో నుండి బ్లాక్‌ స్కెచ్‌ తీసి గీయబోయాడు. అప్పుడు తాళ్ళపాక అనూరాధ బిగ్గరగా ‘ఆపండి’ అని అరిచింది.

శుభమా అని ఆయన స్కెచ్‌ వేయబోతుంటే ఎందు కమ్మా అరిచావ్‌ అని కోటంరెడ్డి శీనయ్య అడిగాడు. శుభమా అంటూ స్కెచ్‌ వేయబోతున్నాడు కాబట్టే ఆపమని అరిచాను. శుభానికి బ్లాక్‌స్కెచ్‌ మంచిది కాదు, పసుపు రంగు స్కెచ్‌ తీసుకోండి… శుభానికి శుభం, మన పార్టీ రంగు కూడా కలిసొస్తుంది అని చెప్పింది. వైట్‌బోర్డ్‌ మీద పసుపు స్కెచ్‌ కనిపిం చదుకదమ్మా అని బీద రవిచంద్ర తన ధర్మసందేహం వెలిబుచ్చాడు. అప్పుడు డాక్టర్‌ జడ్‌యస్‌… వైట్‌ బోర్డు బదులు బ్లాక్‌బోర్డ్‌ మీద ఎల్లో స్కెచ్‌ పెన్‌తో స్కెచ్‌ వేస్తే సరి అని చెప్పాడు. సూపర్‌ ఐడియా అంటూ అందరూ చప్పట్లు కొట్టారు. అప్పటికప్పుడు బ్లాక్‌చార్ట్‌ పేపర్‌ తెచ్చి టేబుల్‌ మీద పెట్టారు. సోమిరెడ్డి పసుపు స్కెచ్‌ తీసుకుని… మీకు ముందు గానే చెబుతున్నాను, రక్తం కళ్ళ చూస్తే కళ్ళు తిరిగి పడిపోయేవాళ్ళుంటే ఆ ఆపరేషన్‌ నుండి ముందు గానే తప్పుకోండని చెప్పాడు. జడ్‌.యస్‌. వుండి… నేను రోజూ వందలమంది రక్తం కళ్ళచూస్తుంటాను, నాకేం ఇబ్బంది లేదన్నాడు. మిగతావాళ్ళు కూడా మేము బ్లడ్‌ క్యాంపుల్లో పాల్గొంటుంటామని, మటన్‌, చికెన్‌ కొట్లకు వెళుతుంటామని, సమస్య లేదని ధైర్యంగా చెప్పారు. దాంతో సోమిరెడ్డి స్కెచ్‌కు శ్రీకారం చుట్టి… ఇది హైవే నుండి అల్లీపురంకు దిగే డొంక రోడ్డు… ఇక్కడ నారాయణ, డాక్టర్‌ జడ్‌యస్‌తో పాటు మరో నలుగురుంటారు. జస్ట్‌ ఇక్కడ మర్డర్‌ మిస్‌ అయ్యిందే అనుకోండి… ఇదిగో ఇది సౌత్‌రాజుపాలెం, అల్లీపురం సెంటర్‌ పాయింట్‌. ఇక్కడ బీద రవిచంద్ర, కోటంరెడ్డి శీనయ్య మరో ఆరుమంది వుంటారు… టైం బాగలేక ఇక్కడ కూడా తప్పించుకుందే అనుకోండి… ఇదిగో ఇది స్టోన్‌హౌస్‌పేట వైపు నుండి వచ్చే మూలరోడ్డు… ఇక్కడ ఈసారి పన్నెండుమంది వుంటారు, ఈ టీంకు కిలారి వెంకటస్వామినాయుడు, తాళ్ళపాక అనూ రాధలు నాయకత్వం వహిస్తారు… ఇక్కడ కూడా ప్లాన్‌ మిస్సయ్యిందే అనుకోండి… ఇది మన ఇంటి ముందర ప్రాంతం… ఈసారి ఇక్కడ నేను, రాజ గోపాలరెడ్డి, మేకల రామ్మూర్తి, దాసరి రాజేష్‌, పెళ్ళకూరు శ్రీనివాసులురెడ్డి… ఇంకో పాతికమంది దాకా వుంటాం… ఇక్కడ తప్పించుకోవడం ఇంపా జిబుల్‌. ఇదీ స్కెచ్‌. ఈరోజు శనివారం… రేపు

ఉదయం 8గంటల కల్లా ఈ రక్తచరిత్ర-3 అమలై పోవాలి. ఒకరు గట్టిగా మెడ పట్టుకుంటే ఇంకొకరు కత్తితో పీక కోసేయాలి అని చెప్పాడు. అప్పుడు జడ్‌.యస్‌. కలుగజేసుకుని సార్‌, చిన్న చేంజ్‌ అని అన్నాడు. ఏంటో చెప్పు అని సోమిరెడ్డి అన్నాడు. స్టార్టింగ్‌ పాయింట్‌లోనే ఇద్దరూ మెడపట్టుకునే వాళ్ళనే వేసారు. కత్తి పట్టుకునే వాళ్ళను వేయలేదు. అక్కడ నా బదులు గాని లేదంటే నారాయణ సార్‌ బదులు గాని బీద రవిచంద్రనో, కోటంరెడ్డి శీనయ్యనో వేయండి అని కోరాడు. సోమిరెడ్డి వెంటనే ఆ విధంగా మార్చేసి… ఈరోజు శనివారం, రేపు ఆది వారం… ఉదయం 8గంటల కల్లా మన రక్తచరిత్ర ఆపరేషన్‌ క్లోజ్‌ కావాలి. అయితేనే ఆ తర్వాత కార్యక్రమానికి వెళ్ళగలం అని చెప్పాడు. ఓకే అంటూ అందరూ లేచారు. ఈ ఆపరేషన్‌ స్కెచ్‌ను అక్కడే వున్న ఓ వైసిపి కార్యకర్త తన సెల్‌ఫోన్‌లో వీడియో తీసి కాకాణి గోవర్ధన్‌రెడ్డికి పోస్ట్‌ చేశాడు. కాకాణి ఈ వీడియోను కేంద్ర హోంశాఖకు, సిబిఐకి, ప్రధాని కార్యాలయానికి పంపి… సోమిరెడ్డి వైసిపి నాయకుల హత్యకు కుట్రపన్నాడని, అతనిని రెడ్‌హ్యాండెడ్‌గా పట్టుకోవాలని కోరాడు.

————

ఆరోజు ఆదివారం… ఉదయం 7గంటలైంది. ఆ టైంకే కేంద్ర పారామిలిటరీ బలగాలు, బ్లాక్‌ కమెండోలు సివిల్‌ డ్రెస్‌లలో సోమిరెడ్డి స్కెచ్‌ వేసిన నాలుగు పాయింట్లలో మోహరించేసారు. వైసిపి నాయకులెవరినీ బయటకు రావొద్దని కేంద్ర ఇంటలిజన్స్‌ వర్గాలు ముందుగానే హెచ్చరించడంతో వాళ్ళు బయటకు రాలేదు. 7.15గంటల సమ యంలో హైవే మలుపు వద్ద తొలిపాయింట్‌… సార్‌, జస్ట్‌ మిస్‌ ఓవర్‌టూ సెకండ్‌ పాయింట్‌ అని జడ్‌.యస్‌. వాకీటాకీలో చెప్పాడు. 7.30నిమిషాలకు సెకండ్‌ పాయింట్‌లో వున్న రవిచంద్ర… చంద్ర మోహనన్నా వెంట్రుకవాసిలో తప్పిపోయింది… ఓవర్‌ టు థర్డ్‌ పాయింట్‌ అని చెప్పాడు. ఎవరు మిస్‌ అవుతున్నారో, ఎలా మిస్‌ అవుతున్నారో మఫ్టీలో వున్న కేంద్ర భద్రతా దళాలకు అర్ధం కావడం లేదు. ఇంతలో 7.45గంటల ప్రాంతంలో థర్డ్‌ పాయింట్‌ నుండి తాళ్ళపాక అనూరాధ వైర్‌లెస్‌ సెట్‌ మెసేజ్‌… సారీ సర్‌… ఇక్కడా మిస్‌ అని. ఇక ఫైనల్‌ పాయింట్‌… సోమిరెడ్డి ఇంటి ముందర ప్రాంతంలో అంతా టెన్షన్‌ వాతావరణం… మేకల రామ్మూర్తి, దాసరి రాజేష్‌, ఈదూరు రామ్మోహన్‌రెడ్డిలు వస్తే కాళ్ళు పట్టుకోవడానికి కాసుకుని వుండగా… పెళ్ళకూరు శ్రీనివాసులురెడ్డి పెద్దకత్తిని పట్టుకుని రెడీగా వున్నాడు. అందరూ అటెన్షన్‌తో వుండగా… క్షణాలలో ఊహించని సంఘటన జరిగిపోయింది. మేకల రామ్మూర్తి ఎగిరి కాళ్ళను పట్టుకోగా… ఈదూరు రామ్మోహన్‌రెడ్డి మెడను పట్టుకున్నాడు. పెళ్ళకూరు శ్రీనివాసులురెడ్డి ఒక్క ఉదుటున ‘జై బాహుబలి’ అంటూ కత్తితో నరికాడు. అంతే మెడ తెగి ఆ రక్తం సోమిరెడ్డి మీద పడింది. ఆ రక్తం చూసి సోమిరెడ్డి చంద్రమోహన్‌రెడ్డి టప్పున కళ్లు తిరిగి క్రిందపడిపోయాడు. వెంటనే రాజగోపాల్‌రెడ్డి, ఈదూరు రామ్మోహన్‌రెడ్డిలు నీళ్ళు చల్లడంతో ఆయన పైకిలేచాడు. అప్పుడే భద్రతా దళాలు సోమిరెడ్డిని చుట్టుముట్టి ఏ.కె.47లను ఎక్కుపెట్టి… యువార్‌ అండర్‌ అరెస్ట్‌ అని అన్నారు. ఆ హఠాత్‌ పరిణా మానికి సోమిరెడ్డి బిత్తరపోయి… సార్‌, కోడిని చంపినా కూడా అరెస్ట్‌ చేస్తారా… అని భయంతో అడిగాడు. కోడా అంటూ ఆర్మీ చీఫ్‌ బిపిన్‌ రావత్‌ క్రిందకు చూసాడు. అక్కడ రక్తపుమడుగులో కోడిపుంజు పడివుంది. ఏంటి ఇదంతా… ఈ వీడియోలో మీరు వేసిన స్కెచ్‌ ఏమిటి, ఈ సీన్‌ ఏంటి.. అని సిబిఐ డైరెక్టర్‌ ఆస్థానా ప్రశ్నించాడు. అప్పుడు సోమిరెడ్డి… సార్‌, ఈ ఆదివారం మా వాళ్ళందరికీ దోశ, నాటుకోడి పులుసు పెడదామని భీమవరం నుండి పందెంకోడిని తెప్పించి ఇంటి దగ్గర కట్టేసాను. అది నిన్న పొద్దున తప్పించుకుని ఈ చుట్టుపక్కల తిరగసాగింది. ఈరోజు ఎలాగైనా దానిని పట్టుకుని కోసి కూరవండుకోవాలని చెప్పి మా వాళ్ళతో ఈ స్కెచ్‌ వేసి, ఈరోజు పొద్దున్నే అమలు చేసాను. ఇది నాటుకోడికి వేసిన స్కెచ్‌ తప్పితే కోడికి కట్టే కత్తితో వేసిన స్కెచ్‌ కాదు… అని చెప్పుకున్నాడు. కోడిని కోయడానికి ‘స్కెచ్‌’ బిల్డప్పా అంటూ కేంద్ర బలగాలు తిరుగుముఖం పట్టాయి.

LEAVE A REPLY

Please enter your comment!
Please enter your name here